Direksyon Pwoteksyon Sivil mande popilasyon an pran devan parapòta siklòn Irma

Pòtoprens, lendi 4 septanm 2017.- Direksyon Pwoteksyon Sivil ki andann Ministè Enteryè ak Kolektivite Teritoryal yo mande popilasyon an pa tann dènye moman pou prepare li parapòta siklòn Irma, ki ka pase sou kòt Nò peyi a ant jedi oswa vandredi. Inite Idwometeyo anonse, jodi lendi a, ouragan Irma,  kategori 3, ap deplase sou lanmè Atlantik la kote li ka frape Ti Antiy yo apati demen maten, apre sa pou li vanse sou zile Ayiti, pandan l ap rete yon gwo ouragan. Parapò ak menas gwo lapli, gwo van, lawoul ak mare tanpèt Irma ka charye, ki  ka lakòz gwo inondasyon, deboulonnay tè ak glisman teren, Sekretarya Pèmanan k ap Jere Risk ak Dezas lanse ‘’faz preyalèt 1 nan nivo vijilans jòn’’, jodi lendi 4 septanm lan. Direksyon Pwoteksyon Sivil pwofite mande popilasyon an pou li : Chache konnen ki abri pwovizwa ki gen nan zòn ou abite a e kibò yo ye. Gade si tèt kay ou, pòt ak fenèt an bon eta. Epi ranfòse yo. Koupe branch bwa ki sou tèt kay ou oubyen ki sou fil kouran ki pre kay ou. Yo ka lakòz danje si gen gwo van ak gwo lapli. Prepare kit ijans ou epi yon ti bwat zouti. Chache yon kote ki asire pou mete bèt ou yo pou sizoka. Swiv enfòmasyon tout tan sou radyo, televizyon ak  sou Entènèt pou ka konn sa k ap pase. Prepare yon plan ijans pou fanmi w oswa regade l si w gen youn deja. -FINISMAN- Kontak : Biwo Kominikasyon Ministè Enteryè ak Kolektivite Teritoryal yo infosmict@gmail.com (509) 4892 3169 (509) 2811 0619