Ministè Enteryè ak Kolektivite teritoryal yo ap raple kèk bon konsiy pou moun k ap fete pandan Pak la

Pòtoprens, vandredi 14 avril 2017 : Ministè Enteryè ak Kolektivite teritoryal yo ap mande pwopriyetè ak majò jon bann rara pou yo pran anpil prekosyon nan jan y ap òganize deplasman moun k ap fete anba responsablite yo, sou tout pakou y ap fè.  Se yon fason pou evite aksidan ak mouvman panik.  Ministè a mande moun k ap patisipe, ki prale oswa ki soti nan aktivite rara, pou mete dlo nan diven yo, fè koutwazi, nan tèt kole epi san vyolans, pou chak moun ka pwofite san kè sote nan youn nan pi gwo fèt nan kilti peyi nou. Ministè a mande otorite lokal yo ak lapolis pou ranfòse operasyon kontwòl ak lòt mezi sekirite pou anpeche aksidan ak lòt pwoblèm. Yo dwe toujou prevwa kèk sitiyasyon epi sèvi ak kominikasyon pou pare ak tout kontraryete ki ta ka rive sou pakou yo. Direksyon Pwoteksyon Sivil jwenn konsiy tou pou li deplwaye, ni nan nivo deptman yo, ni nan nivo lokal, sitou Komite Kominal Pwoteksyon Sivil yo, yon fason pou akonpaye popilasyon an nan aktivite rara nan tout peyi a. Yon lòt bò, Ministè Enteryè mande tout moun ki anvi al nan rara pou yo respekte modòd otorite lokal yo ak konsiy lijyèn sou sa ya p manje, ak kalite dlo ak tafya y ap bwè, pou evite tout dezagreman. Ministè Enteryè ak Kolektivite teritoryal yo swete tout moun, fanm kou gason, pase yon bèl sezon fèt. -FINISMAN.- Kontak : Biwo Kominikasyon Ministè Enteryè ak Kolektivite Teritoryal yo infosmict@gmail.com (509) 4892 3169 (509) 2811 0619