Prepare yon kit dijans pou n pa panike lè gen dezas

Sa pou nou mete nan kit ijans la Men sa nou bezwen pou n prepare yon ki dijans: Yon bokit ak tout kouvèti l ; gwo savon ; klowòks likid ak yon tochon pwòp.   Byen lave bokit la ak gwo savon. Apre sa, rense l pwòp. Pa kite yon ti kras kim ladann; Dezenfekte bokit la ak yon dlo pwòp ki gen klowòks ladann – mete yon ti kiyè klowòks likid nan yon lit dlo (2 boutèy gran manjè egal 1 lit) ; Byen sekwe bokit la, yon fason pou ou mouye tout kò l ; Apre w fin dezenfekte bokit la, rense l pwòp ak dlo potab. Seche l ak yon tochon pwòp ; Make bokit la ak fet (makè) pou w pa boukante l ak lòt veso ;   Mete tout sa w ap bezwen nan kit dijans la nan bokit la. Dlo Sere pou piti 3 galon pa jou pou chak moun. Dlo pou bwè ak dlo pou sèvi. Sonje : Timoun, manman ki nouris ak moun ki malad ap bezwen plis dlo ; Si w rete yon kote ki fè cho, ou ka bezwen plis dlo tou ; Gen pou pi piti 2 fason ou ka trete dlo: bouyi l oubyen mete klowòks ladann. Lè w fin trete dlo a, tann li poze pandan 30 minit anvan ou sèvi avè l ; Sere dlo a nan yon veso plastik ki pwòp e ki byen fèmen, tankou yon galon konsa. Mete l yon kote ki fre e ki pa p pran solèy ; Si se pa dlo trete w achte nan boutèy fèmen, ou dwe ranplase l chak 6 mwa.   Manje ki p ap gate Manje konsèv (sadin, ton, lòt pwason, mayi, pwa, sosis, janbon…) ; Pwason seche (aran, lanmori) ; Ji, poudlèt, sik, diri, pwa, konfiti, manba, lwil, biswit sèk, bonbon, sirèt… Manje espesyal pou timoun ak granmoun Manje tou kwit ; Lèt ; Sereyal… Atik espesyal pou tibebe, fanm ak granmoun Daypè ; Sèvyèt ijyenik. Tout sa ki ka sèvi Flach ak pil rezèv; Radyo ak revèy ki mache ak pil ; Alimèt (pa kite bwat la mouye) ; Sachè ki pa p pran dlo pou pwoteje tout papye enpòtan w yo ; Gwo sachè pou mete fatra ; Ensèktisid ; Siflèt pou si w andanje ; Doub kle kay ou ; Bwat zouti... Kit premye sekou - Medikaman Boul koton ; Twal gaz esteril ; Dlo oksijene ; Betadin ; Pomad antibyotik ; Pomad kòtizòn 1% Adezif plizyè lajè ; Gan ; Sizo ; Remèd pou doulè (analjezik) ; Remèd pou lafyèv : siwo, grenn ; Sewòm oral ; Medikaman doktè preskri w (pou tout moun ki sou trètman).